Suprastanza
dr. fil. Florian Hitz,
president, Cuira
Studi da l'istorgia generala a Turitg, studi da promoziun da l'istorgia dal temp modern e dal temp medieval a Heidelberg. Collavuratur scientific a l'Institut per la perscrutaziun da la cultura grischuna ed a l'Archiv dal stadi dal Grischun. Perscrutaziuns e publicaziuns davart l'istorgia politica, sociala e culturala grischuna dal temp autmedieval fin al temp modern.
dr. fil. Andrea Kauer Loens,
vicepresidenta, Cuira
Andrea Kauer Loens ha studegià germanistica ed istorgia generala a l'Universitad da Turitg. Suenter in'activitad da 17 onns al Museum retic a Cuira, da quels diesch onns sco manadra, ha ella surpiglià il 2024 la direcziun dal Liechtensteinisches LandesMuseum.
lic. fil. e M.A. Ruedi Haltiner,
cassier ed administratur dals commembers, Cuira
Sco mainagestiun pensiunà, psicolog ed istoricher independent che sa concentrescha sin l'epoca contemporana s'interessa el surtut per l'istorgia culturala e politica recenta dal Grischun.
prof. dr. teol. Jan-Andrea Bernhard,
Strada veglia 1, 7130 Strada en Surselva
Jan-Andrea Bernhard ha studegià filologia classica, teologia ed istorgia da l'Europa da l'Ost; suenter è el stà Visiting Professor a Klausenburg en la Rumenia. Dapi il 2013 instruescha el istorgia da la baselgia ed istorgia da l'Europa da l'Ost a l'Universitad da Turitg ed è iniziant e collavuratur da differents projects da perscrutaziun; dapi il 2021 è el er activ sco archivari communal. Sias publicaziuns concernan l'istorgia da la teologia, da la baselgia, dal cudesch e da la communicaziun da la moderna tempriva.
dr. fil. Antonia Bertschinger, M.A., Bravuogn
Antonia Bertschinger è autura independenta e perscrutadra da la cultura istorica. Ella s'occupa dapi il 2016 intensivamain da l'istorgia grischuna dal 17avel tschientaner e perscrutescha actualmain la persecuziun da strias en il Grischun en il rom d'in project da l'Institut per la perscrutaziun da la cultura grischuna. Ella ha publitgà dus romans istorics davart il Grischun en il 17avel tschientaner. Antonia Bertschinger ha studegià filosofia, litteratura englaisa ed istorgia da la baselgia a l'Universitad da Basilea sco era War Studies al King's College London.
lic. fil. Arno Lanfranchi, Haldenstein
*1960 a Poschiavo. Studi da l'istorgia generala, da la scienza d'economia da manaschi e da la linguistica taliana a l'Universitad da Turitg. Diversas publicaziuns e contribuziuns davart l'istorgia da la Val Poschiavo e davart l'istorgia grischuna, surtut davart l'istorgia da las Terras subditas. Collavuraziun al Manual da l'istorgia grischuna (2000).
M.A. Monika Oberhänsli, Cuira
Monika Oberhänsli ha studegià preistorgia e protoistorgia sco er istorgia dal temp medieval a l'Universitad da Turitg e lavura sco dendrocronologa per il Servetsch archeologic dal Grischun.
lic. fil. Reto Weiss, Tumein
Reto Weiss è istoricher e dapi il 2012 archivari dal stadi dal chantun Grischun. L'archiv dal stadi documentescha l'istorgia grischuna dals ultims var 800 onns. Numerusas lavurs en las annalas da la Societad istorica dal Grischun èn resultadas da l'occupaziun cun las funtaunas da l'archiv dal stadi. Reto Weiss sez publitgescha surtut davart dumondas da l'archivistica e l'istorgia da l'archiv e sporadicamain davart l'istorgia regiunala dal Grischun e da Turitg, nua ch'el ha lavurà pli baud.
dr. fil. Ulf Wendler, Cuira
Ulf Wendler ha studegià istorgia, etnologia, medievistica e litteratura populara europeica a las Universitads da Hamburg e Turitg. Suenter avair lavurà blers onns per divers museums tudestgs è el daventà vicearchivari dal stadi dal chantun Schaffusa. Dal 2006 fin il 2024 è el stà archivari da la citad da Cuira. Ses cudeschs ed artitgels tractan temas da l'istorgia da la citad da Cuira, da l'istorgia sociala e da l'istorgia da las epidemias dal temp modern tempriv sco era da la demografia istorica.